28 (15) июня память Свт. Августина Великого, еп. Иппонского (†430)

28 (15) июня память Свт. Августина Великого, еп. Иппонского (†430)

 

 

Святитель Августин родился в африканском городе Тагасте в семье язычника и христианки. Образование он получил в Карфагене. Здесь, в столице Латинской Африки, он вполне поддался царившему в Римской Империи тех лет разврату и, терзаемый совестью, примкнул к секте манихеев, утверждавших извечность и неистребимость зла. Его мать, святая Моника, отказалась принимать еретика в родной дом, и лишь молилась о нем. В качестве преподавателя риторики Августин прибыл в Медиолан в период епископства там святителя Амвросия. Вдохновенное слово святого проповедника перевернуло душу молодого манихея. Под руководством святителя Амвросия Августин начал изучать Священное Писание и в пасхальную ночь 387 года принял святое Крещение. В 391 году епископ Иппонийский Валерий посвятил святого Августина в сан пресвитера, а в 395 году — в сан епископа и назначил викарием Иппонийской кафедры. После смерти епископа Валериана святитель Августин занял его место. Много трудов за 35 лет своего епископства святой Августин посвятил борьбе с ересями донатистов, манихеев и пелагиан. Блаженным Августином написано много творений (по удостоверению ученика и жизнеописателя его Поссидия, число их доходит до 1030), из которых наиболее известны: «О граде Божием», «Исповедь», «17 книг против пелагиан» и «Христианская наука». Скончался святитель 28 августа 430 года.

Служба блаженному Августину, епископу Иппонскому
Творение чтеца Петра
НА МАЛОЙ ВЕЧЕРНИ
Стихиры на Господи воззвах: на 4, глас 8:

Исправление добродетелей твоих, святе, исполни радости вселенную всю, ты бо талант ти данный Господом сторицею приумножил еси и многи люди во спасение управил еси; Христа моли, Августине блаженнейше, да избавит нас от силы вражия.
От художества еллинския философии и лжеплетений еретическаго суемудрия обратився, богомудре к познанию Божественному, показался еси миру учитель мудрейший, святителю Августине, преславно изменився Божественным крещением.
На священноначальство вшед, святителю Августине, священнейший образ священноначальником показался еси: жизнь свою Христу, яко жертву непорочную принесл еси, темже и востекл еси на высокая во премирная селения. Христа моли, Христу помолися всемудре, да спасет души наша.

Слава, глас 6:

Еллинския мудрости премудро небрегл еси и еретическаго суесловия избежав, апостолов же Божественное учение, Святым Духом бряцаемо, святителю Августитне, и огненными языки ясно изглашаемо вещал еси исповедание нашея веры во Отца и Сына, и Святаго Духа — Единаго Бога в Троице прославляемаго.

И ныне: Богородичен:

Ум ангельский и человеческий не может изъяснити неизъяснимаго и преславнаго таинства рождества Твоего, Богородице. Тобою бо Свободный естеством образом раба обнища нас ради по богатству благости, Ему же молися Приснодево, да спасет души наша.

НА ВЕЛИЦЕЙ ВЕЧЕРНИ
Стихиры на Господи воззвах: на 8, глас 8:

Во всю землю изыде вещание богодарованных добродетелей твоих, чудне Августине, и благоухание словес твоих осия вселенную всю, ты бо аки звезда пресветлая возсиял еси любовию, небо церковное украшая, на ея же сияние взирающе вернии веселия исполняются и шествовати ко Иерусалиму горнему научаются, и твоими ходатайствы козней вражиих избавляются. Христа моли, дивный святителю, да спасет души наша.
Дивно житие твое, святе Августине, уподобился бо еси купцу драгих перлов взыскующему: ты бо обрет велие сокровище правыя веры отвергл еси лжемудрие еллинския философии и еретическаго прельщения и всем сердцем прилепился еси Троице во Единице покланяемой, Ей же ныне молися спастися душам нашим.
Велия благочестия столпа яви тя миру чудес Бог, святителю Августине, ты бо отрады и упокоения души своея взыскуя обрел еси нелестное сокровище правыя веры, житием твоим и словом истиность его запечатлел еси и ересей злокозненных терния всемудре посекл еси, и писаньми своими верных помыслы усладил еси. Христа моли, Христу помолися, всечудне, да спасет души наша.
Отче всемудре, богомудрствующих умов похвало, святителю Августине, лопата воистину богоделательная, еюже Христова пшеница очищается, и мерило, имже тяжкое и легкое учений благорассуждается; выну взор ко Господу горе устремленный имея, моли спастися нам.
Дивно житие твое, святе Августине, в немже шествовал еси от тьмы нечестия ко Свету истиному, души поползшияся во мрак заблуждений просвещающему, ослепление же неведения исцеляющему, и шествовати к жизни нестареющейся наставляющему. Ему же ныне молися спастися душам нашим.
Ангелов лицы и человек соборы удивишася, зряще славу Божию, тя облиставшую, святителю славне Августине, ты бо в житии твоем велиим поборником веры, надежды и любви показался еси и дивным учителем покаяния и исправления явился еси, с ними же предстоя престолу Пребожественныя Троицы, моли спастися всем нам.

Слава, глас 6:

О, святителю всеблаженне отче Августине, уста источаюшая божественныя гласы от неоскудевающих источников Премудрости Божественныя почерпающая, преумноживый сторицею талант Богом данный ти, правило, правящее к добродетели, уме богопросвещенный зарею Пребожественныя Троицы, Ея же и непобедимь поборник явился еси; предстоя днесь престолу Ея, молися, молимся, спастися душам нашим.

И ныне: Богородичен.
На литии стихиры, глас 3:

Венец победительный, яко благоподвизающийся приим, востекл еси во обители горния, темже ангелов воинство возвеселил еси о единем кающемся ликовствующее, и от Владыки всяческих слышиши: прииди рабе благий и верный, ныне вниди в радость Господа твоего, приемля трудов воздаяние.
Ум твой, святителю Августине, верою удобренный светел явися всеславне в телеси человека перстнаго и тленнаго, премудре нетлению научився, и страстей кроме явився, светлости бесплотных притяжал еси, с ними же ныне молися Троице Пребожественней спастися, молимся, душам нашим.
Сущая мирская преходящая блага отринув, святителю славне Августине, вжегл еси пламень неуклонныя и теплыя любве ко Господу и с небесе приял еси сияние, светом истины твое сердце и душу просвещающее и из устен твоих токи живоносных наставлений изливающее, и во ограду Небеснаго Царствия путь указующее; его же улучити нам молися, молим тя.

Слава: глас тойже:

Святителю отче Августине, во всю землю изыде вещание исправлений твоих, темже в селениих горних обретаеши мзду трудов твоих, еретическия разорил еси полчища и стадо церковное мудре упасл еси; дерзновение имуще ко Спасу, моли спастися всем нам.

И ныне: Богородичен.
На стиховне стихиры, глас 5:

Огнь горящ явился еси на ереси, блаженне, разумнаго света блистание, красото святительская, христианскаго жития правило, нам же заступник и помощник показался еси, свобождая от губителя души наша.
Христов вертоград дивный процветший покаянием, израстивый многия плоды благочестия, восхваляем тя всякия славы достойнейшаго, святителю блаженне Августине.
Сладость богоразумия излияся изо уст твоих священных, всехвальне Августине, еюже напояеми, восхваляем тя любовию, всехвальне.

Слава: глас тойже:

Учитель теплый и пастырь добрый, святителю Августине, восхваляюще тя вопием: Церковь Христова тобою украшается, кто бо твоея веры, надежды и любви горение к Богу слыша не удивися, — вся боголепно научил еси, святителю, словом и житием по слову, и ныне венцем неувядаемым венчался еси; — моли спастися душам нашим.

И ныне: Богородичен
Тропарь, глас 4:

Сердцем всем Христу последуя, святителю Августине, словом и делом истину запечатлел еси и ересей злочестивых явился еси неленостный искоренитель, молися выну ко святей Троице, да спасет души наша.

НА УТРЕНИ
На Бог Господь: тропарь тойже.
По первом стихословии седален, глас 5:

Погребл еси еретиков лаяния, утвердил же еси верныя во благочестии, сего ради проповедника тя истины вси именуем, великаго учителя, святителя и Христова угодника.

Слава, и ныне: Богородичен:

Мати, Дево безневестная, Пречистая, единое верным предстательство и покрове спасения, избавляй бед и скорбей всяческих на Тя упование возлагающих.

По втором стихословии седален, глас 5:

Преставление твое ко Христу славяще достойно и житие твое всехвальное вспоминающи, воспеваем Творца всяческих, ты бо благочестно Тому последовал еси, и воздержанием увядил еси плотское мудрование, сего ради со святыми во Царствии Отца Небеснаго водворяешися.

Слава, и ныне: Богородичен:

Богородице, Дево Всенепорочная, Пресущаго Бога плотию рождшая, молися Творцу всяческих с великим учителем и святителем Августином спастися нам, Тя славящим верою.

По полиелее седален, глас 4:

Чины воинств небесных удивил еси чистым и святым твоим житием, род же человеческий святительством твоим возвеселил еси, ты бо глубины боговедения позрел еси и красноглаголанием пастве своей и преподал еси, темже души многи от рвов заблуждений пагубных исхитил еси, великий учителю и святителю Августине, моли Христа Бога спастися нам, память твою светло торжествующим. (Дважды).

Слава, и ныне: Богородичен:

Всея вселенныя великое сокровище и радование воспоем, вернии, Деву днесь, Та бо молит со святителем Августином у престола Небеснаго Царя спастися верою Ю ублажающим.

По 50 псалме стихира, глас 6:

Словес твоих божественная благодать нам бысть лествица восхода небеснаго, ты бо еси велий славный святитель и Церкви Христовы богомудрый учитель; житие твое преславно, Августине, и успение со святыми. Моли спастися душам нашим.

Канон, глас 6:
Песнь 1

Ирмос: Яко по суху пешешествовав Израиль, по бездне стопами, гонителя фараона видя потопляема, Богу победную песнь поим вопияше.
Приидите вернии, согласно празднуим препрославленную память великаго святителя и учителя вселенныя Августина блаженнейшаго — еретиков посрамителя и покаяния проповедника.
Избран Господем быв восприяти святительское служение, в правоверии и любви божественней учении твоими премудрыми паству Христову упасл еси.
Премудрость Божественную прияв свыше, учение животворное источил еси, души страстьми попаленныя исцеляющее, славне святителю Августине.
Богородичен: Вселенныя великое сокровище Тя разсмотряем, Дево Пренепорочная, Ты бо миру родила еси от Троицы Единаго, Ему же молися, да спасет ны.

Песнь 3

Ирмос: Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.
Воспоим, вернии, днесь пастыря, святителя и вселенныя учителя, правило веры и начертание, и образ Божественнаго Пастыреначальника.
Божиим волением произбран быв, святитель великий Церкви Христовы явился еси, бескровную тайную жертву принося Божию Агнцу, мира грехи на Ся взъемлющему.
Сеяние слезными молитвами матере твоея святыя явился еси и плод сторичный Творцу Господу верою принесл еси, Августине славне.
Богородичен: Дверь небесную Тя разсмотряем, Богородице, еюже вниде к нам Царь славы, Его же моли спастися нам.

Седален, глас 7:

Еретическая злокозненная шатания утолил еси, Христову же Церковь верно управил еси, темже в селениих горних водворяешися, блаженне, святе Августине.

Слава, и ныне: Богородичен:

Клятвы древния разорение, Богородице, явилася еси, и обетований Его всеспасительных показалася еси, Марие, исполнение. Молися Рождшемуся от Тебе, да избавит ны от силы вражия.

Песнь 4

Ирмос: Христос моя сила, Бог и Господь, честная Церковь боголепно поет взывающи, от смысла чиста о Господе празднующи.
Непреоборимь явился еси, святителю Августине, по Бозе Вседержителе воинствуя и во всем веления того исполняя.
Ограда твердая церковная явился еси, святе, словесами и делами исправляя правая, Августине, великий учителю.
Меч воистину божественный на ереси явился еси и гром, нечестивыя устрашаяй, души же верных словом истины укрепляеши, Августине.
Богородичен: О, Благословенная, Чистая, молимтися: молися к Рождшемуся от Тебе, да избавит души наша от искушений и обстояний.

Песнь 5

Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.
Свещу пресветлу яви тя миру Христос, непостижимым светом тя осияв, блаженне, и святительства правило тя всем показа.
Божественне совершая Божия и чистым умом прикасаяся чистейшим, непорочен обрелся еси, Богу службу творя: освящая, научая и властвуя.
Прикровенное Ветхаго Закона ты пастве твоей уяснил еси, сказуя от Божественных сокровищь Духа, небоявленне Августине.
Богородичен: Тебе, Содетеля плотию рождшей и разорительнице клятвы древней, восклицая молим: спаси осуждения божественнаго верою Тя блажащия.

Песнь 6

Ирмос: Житейское море воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.
Души гладом тающия напитал еси и жаждущия веселия божественнаго исполнил еси проповедуя и вещая, всехвальне Августине.
Медоточныя капли добродетели всякия любомудренно собрал еси и от них вселенную усладил еси, отче блаженнейший.
Благодатию Божественною осиян быв, худшая на лучшая пременил еси и сокровище некрадомое обрел еси, святителю всехвальне.
Богородичен: Слово Божественное во чреве вмещшая и миру всему Спасение рождшая, не премолчи за ны моляся ко Господу.

Кондак, глас 4:

Непоколебиме столпе Церкви Вселенския на недвижимем камени веры основанный, догмат православия нелестный учителю и покаяния велегласный проповедниче, запечатлителю истины, прехвальне Августине, святителю Христов.

Икос:

Премудрости уста, чаша целомудрия, уяснитель догмат божественных — Августин блаженнейший всем мысленно сияет. Приидите, уподобимся того смирению, вере и любве имиже дом Божества показася. И ставше в радости тако да возопиим ему: радуйся, всехвальне Августине, Божественныя Премудрости исполненный.

Песнь 7

Ирмос: Росодательну убо пещь содела ангел преподобным отроком, халдеи же опаляющее веление Божие, мучителя увеща вопити: благословен еси Боже отец наших.
Светлостьми Премудрости осиян быв, паству твою облистав, пети подвигл еси Творцу всех: благословен Бог отец наших.
Во глубины непостижныя ум вперив, многоценный бисер разума стяжал еси, и мир премудростию наполнив, звати подвигл: благословен Бог отец наших.
Гордаго силу пресекл еси, смирением твоим, блаже, к Богу чистым твоим разумом возносимый, Ему же пети научил еси: благословен Бог отец наших.
Богородичен: Купину Тя огнегорящую Господь Моисею в Синаи древле прообразова, Ты бо огнь Божества невещественнаго телесно прияла еси, мира спасения начало устроив. Молися ко Святей Троице обрести нам спасение, мир и богатую милость.

Песнь 8

Ирмос: Из пламене преподобным росу источил еси, и праведнаго жертву водою попалил еси: вся бо твориши, Христе, токмо еже хотети, Тя превозносим во вся веки.
Богоприятен святитель показался еси, отче Августине, помазуя священники Божественным Духом и людей просвещаяй, блаженнейше, да взывают: благословите вся дела Господя Господа.
Сердца, беснящияся недугом душегубным ереси скорыми словес твоих лечбами уставил еси, яко врач благодатиею Божиею, Всесвятым отгнал еси Духом, сего ради благословите вся дела Господня Господа.
Праведниче, якоже финикс в дому Господни, отче, процвел еси правды плоды, имиже тя чтущие питаются, восклицая: благословите вся дела Господня Господа.
Богородичен: Глаголом благодатных Твоих устен последующе, ублажаем Тя, Присноблаженную и взываем: благословите вся дела Господня Господа.

Песнь 9

Ирмос: Бога человеком невозможно видети, на Негоже не смеют чини ангельстии взирати; Тобою же, Всечистая явися человеком Слово воплощенно, Егоже величающе, с небесными вои Тя ублажаем.
Пребывает слава твоя во веки, святе, и память со всеми праведными, с ними же и нам вселитися моли, Августине, великий молитвенниче.
Всю зарю Утешителеву, блаженне, приял еси и истекают нам по Божественному слову из чрева твоего реки разума; воистину бо источника непрестанна благодать показа тя миру, Августине, во веки.
Яко солнце светозарное возсия память твоя миру, отче Августине, световодящи в пристанище немятежное небесное верою тя восхваляющия.
Богородичен: Отроковица Пречудная, прежде век Сущаго прияла еси и миру Спасение родила еси нам за крайнее благоутробие уподобившееся; спаси ны, верою Тя блажащия.

Светилен:

Ревнителю ведения истины от юнаго воспитания, святе Августине, за истину потщался восстати и ереси всегорькия посекл еси мечем уст твоих; и ныне на небесех престолу Троицы Святыя предстоя, прилежно о нас молися, верою и любовию память твою совершающих.

Слава, и ныне: Богородичен:

Премудрость Ипостасную и Слово Пресущее, и всех Врача рождшая, Всечистая Дево,исцели душ наших струпы страстныя и сохраняй неврежденны от всякаго находа вражия Тя молящих, Усердная Заступнице.

На хвалитех стихиры, глас 8:

О, всехвальне святителю Августине, уставил еси желание скорогибнущих, и совершеннейших желание удержав, в селениих праведных вселился еси; ко Святей Троице со всеми святыми о нас молися, да осияет светом Истины души наша. (Дважды).
О, блаженне отче Августине, таинник небесных изряднейший, свеща воистину миру негасимая, сияющая светом Божественных учений, огнь воистину ереси попаляющий; Троице ныне предстоя со апостольским ликом и пророческим, мучеников, исповедников и всех праведных, поминай ны, верою твою память творящих.
О, изряднейший учителю Августине, сокровище велие — твоя словеса отеческая нам оставил еси, души воистину богатящее и разум во правомыслии соблюдающее; бодра пастыря яви тя миру чудес Бог, Емуже молися о нас, тя верою ублажющих.

Слава, глас тойже:

Непостижныя Троицы проповедник явился еси: Отца — Перваго Ума и всяческих Виновниеа возвестил еси, Слово Родителево убо, вкупе же и Производителева Духа Святаго песнопел еси; молися Пребожественней Троице во Единице покланяемой улучити нам горния обители.

И ныне: Богородичен.
Молитва
блаженному Августину, епископу Иппонийскому

О, преславный Христов святителю, Вселенския Церкви похвало и учителю богомудрый, православия наставниче и покаяния проповедниче, блаженне Августине! Призри с горних высот на нас недостойных, ищущих твоей помощи и милосердия: умоли Владыку всяческих, Емуже на земли всем житием твоим служил еси, да дарует нам неуклонное хранение неповрежденныя правыя веры, юже от Господа чрез учеников Его прияли есмы, да поможет запечатлевати ю делы любви и милосердия, и да споспешествует нам во благих наших начинаниях; защити ны от злобных навет вражиих и помози всем нам твоим ходатайством улучити Царствие Небесное, идеже ты ныне в незаходимей сияеши славе пред лицем Всемилосерднаго Бога в Троице покланяемаго и славимаго во вся веки веков. Аминь.

Подготовлено диаконом Максимом Плякиным